Aprè atelye travay asosiyasyon KOURAJ te òganize jou ki te jedi 15 janvye 2015 lan. Minis demisyonè a sou kesyon dwa moun lan fè soti yon nòt pou laprès pou montre angajman Gouvènman an sou sa ki a wè ak respè e pwoteksyon dwa moun ki Masisi, Madivin, Makomè, Miks nan peyi a.

Publié: janvier 17, 2015 dans Mis à jour

unnamed

BIWO MINIS DELEGE BÒ KOTE PREMYE MINIS LAN AN CHAJ KESYON DWA MOUN E K AP GOUMEN KONT LAMIZÈ

Òganizasyon KOURAJ reyalize yon atelye travay sou diskriminasyon

 

Pòtoprens, 16 janvye 2015 – Minis demisyonè Marie Carmèle Rose Anne Auguste patisipe jounen jedi 15 janvye a nan otèl Oasis nan yon atelye travay òganizasyon KOURAJ, yon òganizasyon kap defann dwa omoseksyèl yo.

Objektif atelye sa a se ranfòse batay k ap mennen pou elimine diskriminasyon k ap fèt kont omoseksyèl  yo epi goumen pou fè dwa yo respekte. “Batay kont diskriminasyon, kisa lalwa di?”, se sou tèm sa atelye a te dewoule. Tèm sa rejwenn preokipasyon gouvènman an nan batay lap mennen pou garanti respè dwa moun, daprè Minis Rose Anne Auguste.

Nan diskou li, Minis delege kap defann dwa moun epi k ap konbat povrete ekstrèm lan plede pou gen yon sosyete kote dwa tout sitwayen ak sitwayèn alawonnbadè respekte.

Nan divès mekanism li deja mete kanpe depi prezidan Michel Joseph Martelly rive sou pouvwa a, gouvènman an toujou mete anpil aksan sou enklizyon tout moun nan sosyete a ak sou batay kont tout fòm diskriminasyon; 2 eleman sa yo se baz ideyolojik politik sosyal ak ekonomik gouvènman an. Batay kont diskriminasyon an se yon gwo batay, daprè Minis Auguste ki rete kwè li nesesè pou n chanje mantalite yo, pou prejije sispann nan peyi a.

Atelye 15 janvye a se kòmansman chita tande KOURAJ ap mennen ansanm ak divès aktè kap travay nan domèn dwa moun, daprè Charlot Jeudy, ki se prezidan KOURAJ.

Mesye Jeudy fè konnen pwoblèm omoseksyalite a ak rekonesans li poze nan mitan jèn yo ak fanmi yo. Responsab KOURAJ la panse fòk nou pa voye sou kote konsekans sa genyen sou yon jèn ki deklare li   se omoseksyèl. Li pwofite tou pou denonse yon seri konpòtman diskriminatwa ki abitye manifeste kont yon seri sitwayen akoz oryantasyon seksyèl yo.

Publicités

Les commentaires sont fermés.